पर्सा । प्रहरी उपरीक्षक (एसपी) गौतम मिश्रले सोमबार जिल्ला प्रहरी कार्यालय पर्साको प्रमुखको रूपमा औपचारिक रूपमा कार्यभार सम्हालेका छन्। चितवनबाट सरुवा भई आएका एसपी मिश्रलाई जिल्ला प्रहरी कार्यालय पर्सामा प्रहरी नायब उपरीक्षक (डिएसपी) किशोर लम्साल, वडा प्रहरी कार्यालय बिर्ताका प्रमुख निरोज चौलागाईंलगायतका प्रहरी अधिकारीहरूले स्वागत गरेका थिए।
पदभार ग्रहणपछि एसपी मिश्रले आफ्नो कार्यकाललाई इमान्दारिता, अनुशासन, कर्तव्यनिष्ठा र जनताप्रतिको उत्तरदायित्वको आधारमा अघि बढाउने प्रतिबद्धता जनाएका छन्। उनले प्रहरी संगठनभित्र अनुशासन कायम राख्दै अपराध नियन्त्रण, शान्ति र सुरक्षाको सुदृढीकरणलाई मुख्य प्राथमिकतामा राख्ने स्पष्ट पारे। साथै, उनले प्रहरी जवानदेखि उच्च अधिकारीसम्म सबैलाई जिम्मेवारीप्रति गम्भीर र इमानदार हुन निर्देशन दिए।
एसपी मिश्र यसअघि २०६४ सालमा वडा प्रहरी कार्यालय श्रीपुरको प्रमुखका रूपमा कार्यरत रहँदा आफ्नो कार्यकालमा महत्वपूर्ण उपलब्धि हासिल गरेका थिए। उनले त्यहाँका दाताहरूको सहयोगमा भाडाको भवनमा सञ्चालन भइरहेको कार्यालयलाई निजी भवन निर्माण गरी व्यवस्थित बनाएका थिए। यसले उनको नेतृत्व क्षमताको स्पष्ट परिचय दिएको छ।
चितवनमा दुई महिनासम्म कार्यरत रहँदा मिश्रले त्यहाँको शान्ति र सुरक्षामा सशक्त भूमिका निर्वाह गरेका थिए। पर्सा जिल्लाको नेतृत्व सम्हाल्नुअघि उनले चितवनमा पनि आफ्नो कार्यदक्षताको छाप छोडेका थिए।
पर्सा प्रहरी प्रमुखको रूपमा जिम्मेवारी सम्हालेपछि एसपी मिश्रले जिल्लामा शान्ति, सुरक्षा र अपराध नियन्त्रणलाई विशेष प्राथमिकता दिने र यसका लागि स्थानीय जनताको सहयोगलाई समेत सुनिश्चित गर्ने बताएका छन्। उनले प्रहरी संगठनभित्र अनुशासन र जनताप्रतिको उत्तरदायित्वलाई निरन्तरता दिने आफ्नो अठोट दोहोर्याएका छन्।
उनको कार्यकालमा पर्सा जिल्लामा शान्ति, सुरक्षा र अपराध नियन्त्रणमा महत्वपूर्ण सुधार हुने आशा गरिएको छ। एसपी मिश्रले जिल्लावासीको विश्वास जित्दै प्रहरी संगठनप्रति जनताको भरोसा बढाउन विशेष ध्यान दिने वाचा गरेका छन्।
