बिरगंजको आदर्शनगरबाट प्रहरीले स्रोत खुलाउन नसकेको ६ लाख रुपैयाँसहित भारतीय युवकलाई नियन्त्रणमा लिएको छ। जिल्ला प्रहरी कार्यालय, पर्साका अनुसार भारत, बिहारको रक्सौल वडा नम्बर १४ निवासी २७ वर्षीय ओमकुमार रौनियारलाई मोटरसाइकल चेकजाँच गर्ने क्रममा पक्राउ गरिएको हो।
रक्सौलबाट बिरगंज आएका रौनियार सवार बीआर ०५ क्यु ४३८४ नम्बरको मोटरसाइकललाई आदर्शनगरमा रोकी प्रहरीले जाँच गर्दा, मोटरसाइकलको लेगार्डमा झुण्ड्याइएको प्लास्टिकको बोराबाट नेपाली ५ सय दरका १,२०० थान नोट फेला परेको थियो। स्रोत खुलाउन नसकेपछि उनलाई नगदसहित नियन्त्रणमा लिइएको प्रहरी नायब उपरीक्षक किशोर लम्सालले जानकारी दिए।
रौनियारविरुद्ध मुलुकी अपराध संहिता, २०७४ को दफा १२५ (क) अनुसार हुण्डी कारोबारको आशंकामा थप अनुसन्धान भइरहेको प्रहरीले जनाएको छ।
