कालीकोट, चैत २० गते । कालीकोटको खाँडाचक्र नगरपालिकाभित्रका सामुदायिक विद्यालयका शिक्षकले ६ महिनादेखि तलब भत्ता पाएका छैनन । मासिक रुपमा पाउनु पर्ने तलव भत्ता नपाएपछि मंगलबारदेखि नगरपालिका अगाडि चरणबद्ध आन्दोलन सुरु गरेका छन् । पहिलो दिन ज्ञापनपत्र बुझाएका शिक्षकले बुधबार नगरपालिका घेराउ गरेका हुन् । चालु आर्थिक वर्षको असोजदेखि हालसम्म शिक्षकहरूले तलब तथा अन्य सेवासुविधा नपाएको भन्दै नगरपालिकाभित्र ३९ वटै सामुदायिक विद्यालयका शिक्षक कर्मचारीले खाँडाचक्र नगरपालिकाको कार्यालय घेराउ गरेका छन् । पहिलो दिन नगरप्रमुख कमलबहादुर शाहीलाई ज्ञापनपत्र बुझाएका शिक्षक बुधवार पनि आन्दोलनमा छन् । नेपाल शिक्षक महासंघ कालीकोटले यसअघि पटक–पटक तलब–भत्ता दिन आग्रह गरेका थिए ।

नगरपालिका प्रशासनले सो समस्या समाधान गर्नेतर्फ वास्ता नगरेपछि शिक्षकले ज्ञापनपत्र पेससहित आन्दोलनमा जानु परेको शिक्षकको भनाइ छ । चुलिमालिका मावि घोडेनाका प्रधानाध्यापक दिपबहादुर शाहीले तलव पाउँ भनेर पनि सरकारसँग झगडा गर्नुपरेको बताउनुभयो । ६ महिनादेखि तलब सुविधा नपाएपछि बाध्य भएर ज्ञापनपत्र बुझाउने र नगर सरकारको ध्यानाकर्षण गर्न पुगेको शाहीले सुनाउनुभयो । असोजदेखि तलब भत्ताका नाममा केही पाउन नसकेको उहाँको भनाइ छ । हाम्रो पनि परिवार र बालबालिका छन, शिक्षकले शाहीले धैर्यताको बाँध टुटेपछि बाध्य भएर शिक्षक आन्दोलित हुन् परेको सुनाउनुभयो । शिक्षक पवित्राकुमारी शाहीले तलव भत्ता नपाउँदै दैनिक क्रियाकलाप घरधन्दा चलाउन समेत समस्या भएको बताउनुभयो । संसारमा काम गरेको घण्टाको हिसाबले तलब पाउँछन् ।

पबित्राजस्तै शिक्षक कल्पना सेजुवालको पनि उस्तै समस्या छ । नगरपालिका पुग्नुभएकी शिक्षक कल्पना सेजुवालले बालवालिकाको बार्षिक परीक्षामा शुल्क भुक्तानी गर्न अरुबाट ब्याजमा रुपियाँ सापटी लिन परेको बताउनुभयो । सरकारले निजामती कर्मचारी, सुरक्षा निकाय, स्वास्थ्य क्षेत्र लगायतका अन्य निकायका कर्मचारीलाई भने महिना–महिनामा तलब खुवाउँछ, तर शिक्षकको हकमा भने पहिला–पहिला चार–चार महिनामा र अचेल तीन–तीन महिनामा तलब दिने गरिएकोमा पनि नगरपालिकाले दोस्रो त्रैमासिक र तेस्रो त्रैमासिकको तलबभत्ता भुक्तानी नगर्दा शिक्षक मारमा छन् । विद्यालय शिक्षक, विद्यालय कर्मचारी, बाल शिक्षक तथा नगर अनुदान शिक्षकको तलबभत्ता सरकारले मासिक रूपमा उपलब्ध गराउने व्यवस्था गरेको भए पनि खाँडाचक्र नगरपालिकाले विगत ६ महिनादेखि तलब भत्ता निकासा नगर्नु खेदजनक रहेको ज्ञापनपत्रमा उल्लेख छ । खाँडाचक्र नगरपालिकाभित्रका शिक्षकहरूको पिरमर्का नबुझी नगर सरकारको लापरबाहीका कारण लामो समयसम्म पनि निकासा नदिनु र पहल नगर्नु नगरको ठुलो कमजोरी ठहर गरी आन्दोलनमा उत्रनु परेको ज्ञापनपत्रमा उल्लेख छ ।

कार्यालय प्रमुख नहुँदा समस्या खाँडाचक्र नगरपालिकामा प्रमुख कमलवहादुर शाहीले संघीय सरकारले समयमा प्रमुख प्रशासकीय अधिकृत नखटाएका कारणले दैनिक कामकाजमा समस्या भएको बताउनुभयो । प्रशासकीय अधिकृत र लेखापालका कारण नगरपालिकाको आर्थिक गतिविधि ठप्प छ । नगर प्रमुख शाहीले नगरपालिकामा पहिलेदेखि प्रमुख प्रशासकीय अधिकृत नहुँदा र नयाँ लेखापाल तालिममा गएका कारण नगरपालिकाको आर्थिक गतिविधि ठप्प रहेको बताउनुभयो ।शिक्षकको हकमा आफू पनि चिन्तित रहेको बताउँदै शिक्षकको तलब भत्ता छिटो हाल्न कर्मचारीलाई निर्देशन दिइसकेको भए पनि शिक्षकले नगरपालिका घेराउ गर्नु राम्रो नभएको प्रतिक्रिया दिनुभयो । लेखापाल तालिममा हुनुहुन्छ, आउनेबितिकै भुक्तानी हुन्छ, प्रमुख शाहीको भनाइ छ ।

विद्यालय शिक्षक, विद्यालय कर्मचारी, बाल शिक्षक, संघीय अनुदान तथा नगर अनुदानलगाएत शिक्षकको तलब निकासा गर्नुपर्ने, दिवा खाजा, पाठ्यपुस्तक लगायतका अन्य अनुदान निकासा गर्नुपर्ने मागसहित शिक्षक आन्दोलनमा छन् । शिक्षकका माग समयमै पूरा नगरे अन्य आन्दोलनका कार्यक्रम अघि सार्ने चेतावनी शिक्षकका संघ संगठनले चेतावनी दिएका छन् ।

नगरपालिकाभित्रका सामुदायिक विद्यालयका शिक्षकले ६ महिनादेखि तलब भत्ता पाएका छैनन