सुनसरी जिल्लाको कोशी गाउँपालिका–१, भन्सार कार्यालय अगाडि लागू औषध ब्राउन सुगरसहित एक जनालाई प्रहरीले पक्राउ गरेको छ। पक्राउ पर्ने व्यक्ति भोजपुर जिल्ला, अरुण गाउँपालिका–५ का २६ वर्षीय तेजेन्द्र कार्की रहेको जिल्ला प्रहरी कार्यालय, सुनसरीले जनाएको छ।
कार्की भारतबाट नेपालतर्फ पैदल आइरहेका बेला शंका लागेपछि प्रहरीले चेकजाँच गर्दा उनको साथबाट २ ग्राम खैरो हेरोइन जस्तो देखिने लागू औषध फेला परेको थियो। प्रारम्भिक सोधपुछका क्रममा कार्कीले प्रदेश १–०२–००२ च ५३४८ नम्बरको *YODDA PICK UP* गाडी आफूले चलाएर ल्याएको र उक्त गाडी कोशी गाउँपालिका–१, लौकही बजारमा पार्किङ गरेको बताएका थिए।
प्रहरीले उक्त गाडी जाँच गर्दा त्यसभित्र ११ वटा बोरामा प्याक गरिएको ३२३.२१ किलोग्राम गाँजा फेला पारेको छ। गाडी र लागू औषधसहित कार्कीलाई नियन्त्रणमा लिई थप अनुसन्धान अघि बढाइएको डीएसपी योगराज खतिवडाले जानकारी दिनुभयो।
डीएसपी खतिवडाले भने, “हामी लागुऔषध कारोबार तथा अपराधमा संलग्न जो-कोहीलाई कानुनी दायरामा ल्याउने प्रतिबद्धताका साथ अगाडि बढिरहेका छौँ।” उनले थपे, “नागरिकको सेवामा समर्पित भई सुनसरीलाई सुरक्षित, अनुशासित र अपराधमुक्त बनाउने हाम्रो निरन्तर प्रयास जारी छ।”
डीएसपी खतिवडाको सक्रियता र सफलता जिल्लावासीले पनि सराहना गरेका छन्। सीमावर्ती गतिविधिको निगरानी, अपराध नियन्त्रण र शान्ति सुव्यवस्था कायम गर्नमा उहाँको योगदान सर्वत्र प्रशंसनीय मानिएको छ ।
