बराहक्षेत्रमा मृगको मासु काट्दै गरेका दुईजना भरुवा बन्दुकसहित पक्राउ

सुनसरीको बराहक्षेत्र–१ तल्लो बगुवा टोलमा मृगको मासुसहित दुईजना पक्राउ परेका छन्। इलाका प्रहरी कार्यालय महेन्द्रनगर र चतरा सुनसरीबाट खटिएको संयुक्त प्रहरी टोलीले सोमबार बिहान करिब २ बजे उनीहरूलाई नियन्त्रणमा लिएको हो।पक्राउ परेकाहरूमा ४४ वर्षीय मनबहादुर राई र ४२ वर्षीय राजेन्द्र राई छन्। उनीहरू भान्साघरमा मृगको मासु काट्दै गरेको अवस्थामा फेला परेका थिए। पक्राउको क्रममा प्रहरीले उनीहरूबाट ३ नाल भरुवा बन्दुक समेत बरामद गरेको छ।प्रहरीका अनुसार विशेष सूचनाका आधारमा गरिएको अपरेशनमा भरुवा बन्दुक र मृगको मासुसहित पक्राउ गरी थप अनुसन्धान अघि बढाइएको छ। यो घटनाले वन्यजन्तु चोरी शिकारीविरुद्धको अभियानलाई थप सशक्त बनाउन जरुरी रहेको संकेत गरेको छ।